“Mədəni Əlaqələrin İnkişafına Dəstək” İctimai Birliyinin təşkilatçılığı ilə Beynəlxalq Əlillər Günü ilə bağlı tədbir keçirilib » Hərbiand

Son Dəqiqə:

“Mədəni Əlaqələrin İnkişafına Dəstək” İctimai Birliyinin təşkilatçılığı ilə Beynəlxalq Əlillər Günü ilə bağlı tədbir keçirilib

2 dekabr 2017-ci il tarixində “Mədəni Əlaqələrin İnkişafına Dəstək” İctimai Birliyinin (MƏİDİB) təşkilatçılığı və dəstəyi ilə “3 Dekabr-Beynəlxalq Əlillər Günü” ilə bağlı Dövlət Sosial Müdafiə Fondunun 1 saylı Psixonevroloji Sosial Xidmət Müəssisəsi ilə birgə “İstedadlısansa qüsursuzsan” devizi altında xeyriyyə tədbiri həyata keçirilib.

Qeyd edək ki, Beynəlxalq Əlillər Günü ilə bağlı tədbirin həyata keçirilməsinin əsas məqsədi cəmiyyəti əlillik problemlərinin həllinə cəlb etmək, əlilliyi olan bütün insanların hüquqlarını qorumaqdır. Bildiyimiz kimi, Azərbaycanda bu qəbildən olan insanların sosial rifahının yüksəldilməsi istiqamətində dövlət tərəfindən mühüm addımlar atılır, bu insanların sosial təminatı ildən-ilə daha da yaxşılaşır.

Ölkəmizdə əlillərin sosial müdafiəsi ilə bağlı həyata keçirilən geniş miqyaslı tədbirlərin əsası ulu öndər Heydər Əliyev tərəfindən qoyulub. Əlillərin, şəhid ailələri və müharibə veteranlarının sosial müdafiəsi Prezident İlham Əliyevin də diqqət mərkəzindədir. Buna əsasən, dövlət başçısının uğurlu siyasətini davam etdirmək və əlil uşaqlara mənəvi dəstək olmaq məqsədilə “Mədəni Əlaqələrin İnkişafına Dəstək” İctimai Birliyinin təşkil etdiyi tədbir əlil uşaqların istedadının sərgilənməsində mühüm rol oynayıb.

“İstedadlısansa qüsursuzsan” devizi altında baş tutan tədbirin rəsmi hissəsində ilk olaraq çıxış edən “Mədəni Əlaqələrin İnkişafına Dəstək” İctimai Birliyinin sədri İlahə Qismət və Dövlət Sosial Müdafiə Fondunun 1 saylı Psixonevroloji Sosial Xidmət Müəssisəsinin rəhbəri Rəhnumə Cəfərova öncəliklə arzularını dilə gətiriblər. İlahə Qismət çıxışında cənab Prezident İlham Əliyev və ölkənin birinci xanımı Mehriban Əliyeva başda olmaqla “Mədəni Əlaqələrin İnkişafına Dəstək” İctimai Birliyinə bu şəraiti yaradan Dövlət Sosial Müdafiə Fondunun 1 saylı Psixonevroloji Sosial Xidmət Müəssisəsinin rəhbərliyinə təşəkkür edib və çıxışına davam edərək bildirib ki, İctimai Birlik bir aydan artıqdır ki, əlil uşaqlarla işləyir: “Biz bu müddət ərzində bir daha şahid olduq ki, həqiqətən də, istedadlı olmaq qüsursuz olmaq deməkdir”.

Daha sonra, tədbir şairə Nazilə Səfərlinin aparıcılığı altında davam edib. Tədbirin bədii hissəsində əlil uşaqları sevindirmək və onlara dəstək olmaq məqsədilə ulduzlar əlil uşaqlarla eyni səhnəni bölüşərək onlarla duet oxuyublar. Təşkil olunan layihə çərçivəsində ulduzlar – xalq artistləri Zümrüd Məmmədova, Gülyaz Məmmədova, muğam ifaçısı Babək Niftəliyev, Qala qrupu, aşıq Solmaz Kosayeva, həmçinin gənc musiqiçilər Lalə Namiqqızı və Toğrul Axundov çıxış ediblər. Sonda, əlil uşaqlar arasında viktorina keçirilib və onlara müxtəlif hədiyyələr paylanılıb.

Aytən Nazimqızı

Şərh Yaz