Məşhur sənətçilərin Naxçıvan konserti reallaşdı: Şəhid və qazi övladları üçün unudulmaz əyləncə gecəsi

Tanınmış meyxanaçı və müğənni Balaəli Rzayevin və Eltun Əsgərin Naxçıvan səfərləri çərçivəsində şəhid ailələrinin və qazilərin nümayəndələri ilə birlikdə Şəhidlər xiyabanını ziyarət edərək qəhrəmanlarımızın əziz xatirəsini ehtiramla yad etməsindən sonra, axşam saatlarında uşaqlar üçün gözlənilən möhtəşəm konsert proqramı və "Balon" əyləncə şousu baş tutub.

Tədbir aparıcının qonaqları və iştirakçıları səmimi salamlaması ilə açıq elan edilib. Rəsmi hissədə ilk olaraq Azərbaycan Respublikasının Dövlət Himni səsləndirilib, ulu öndər Heydər Əliyevin və torpaqlarımızın azadlığı uğrunda canından keçən şəhidlərimizin unudulmaz xatirəsi bir dəqiqəlik sükutla yad olunub.

Daha sonra çıxış üçün söz "Naxçıvan Şəhid Ailələri" İctimai Birliyinin mətbuat katibi Bəxtiyar Əliyevə və "Naxçıvan Qaziləri" İctimai Birliyinin təsisçisi Əli Əlisoya verilib. Natiqlər öz çıxışlarında bu cür xeyirxah və genişmiqyaslı tədbirlərin keçirilməsinin əhəmiyyətindən bəhs ediblər. Onlar vurğulayıblar ki, şəhid və qazi övladlarının asudə vaxtlarının səmərəli və xoş keçirilməsi, onların üzündə təbəssüm yaradılması hər birimizin mənəvi borcudur və bu nəcib addım tədbirə xüsusi bir anlam qatıb. Çıxış edənlər uşaqların sevincinə səbəbkar olduqları üçün tədbirin təşkilatçılarına və sənətçilərə dərin təşəkkürlərini bildiriblər.

Rəsmi hissənin ardından gecənin bədii və əyləncəli proqramına start verilib. Uşaqların sevimli cizgi film qəhrəmanlarının maskotları (personajları) səhnəyə daxil olaraq azyaşlı qonaqları coşqu ilə əyləndirib, onlarla rəqs edərək maraqlı oyunlar nümayiş etdiriblər.

Gecənin musiqili hissəsində populyar ifaçılar Balaəli Rzayev və Eltun Əsgər bir-birindən dinamik və sevilən mahnıları ilə səhnəni canlandırıblar. Sənətçilərin canlı performansları uşaqlar və valideynlər tərəfindən böyük rəğbətlə qarşılanıb. Canlı ifalardan sonra DJ Radimin səsləndirdiyi ritmik və müasir musiqilər, eləcə də rəngarəng "Balon" şousu əyləncəni zirvəyə daşıyıb.

Gecənin sonunda isə uşaqlar üçün ən yaddaqalan və sevincli anlar yaşanıb. Təşkilatçılar tərəfindən xüsusi olaraq hazırlanmış rəngarəng hədiyyələr qazi və şəhid övladlarına təqdim edilib. Hədiyyələrini alan və müğənnilərlə xatirə fotoları çəkdirən azyaşlıların üzündəki təbəssüm və gözlərindəki böyük sevinc hissi bu möhtəşəm bayram şousunun ən gözəl yekunu olub. Onların yaddaşında silinməz izlər qoyub, onlara unudulmaz anlar bəxş edib.

Bəxtiyar ƏLİYEV

"Naxçıvan Şəhid Ailələri" İctimai Birliyinin mətbuat katibi