Avropa Ukraynanın ABŞ kəşfiyyatından asılılığını azaldacaq

Avropa ölkələri Ukraynanın Amerika kəşfiyyatının dəstəyindən asılılığını sürətlə azaltmaq imkanlarını nəzərdən keçirirlər.

Herbiand.az bildirir ki, bu barədə The Financial Times qəzeti müzakirələrlə tanış mənbələrə istinadən məlumat verib.

Qəzetin məlumatına görə, Aİ liderlərinin bu yaxınlarda keçirilən zirvə toplantısında iştirakçılar həm orta, həm də uzunmüddətli perspektivdə ABŞ-dan asılılığı sistematik şəkildə azaltmağın vacibliyi barədə razılığa gəliblər. Bu mövqe qapalı danışıqlarda iştirak edən Aİ rəsmisi tərəfindən təsdiqlənib.

ABŞ-ın fəal iştirakdan çıxması və Prezident Donald Tramp tərəfindən kəşfiyyat paylaşımı və silah təchizatının müvəqqəti dayandırılmasından sonra yanaşma dəyişikliyi sürətlənib. Ukrayna və Avropa rəsmiləri qeyd edirlər ki, bu şəraitdə Kiyevin digər müttəfiqləri öz imkanlarını və resurslarını istifadə etməyə məcbur olublar.

Xüsusilə, Fransa prezidenti Emmanuel Makron yanvar ayında Parisin indi Ukraynaya kəşfiyyat məlumatlarının təxminən üçdə ikisini təqdim etdiyini açıqlayıb.

Qərb rəsmilərindən biri vurğulayıb ki, mövcud dinamika davam edərsə, Kiyevin Amerika kəşfiyyatından asılılığı yaxın bir neçə ay ərzində əhəmiyyətli dərəcədə azala bilər.

Bəxtiyar CƏFƏRLİ