BMT-nin tədbirində Orta Dəhlizin strateji əhəmiyyəti vurğulanıb

Xarici işlər naziri Ceyhun Bayramov BMT-nin Asiya və Sakit Okean üzrə İqtisadi və Sosial Komissiyasının (BMT ASİSK) səksən ikinci sessiyasında iştirak edir.

XİN-dən Herbiand.az -a verilən xəbərə görə, Banqkok şəhərində keçirilən sessiyanın açılışında Prezident İlham Əliyevin müraciəti nazir Ceyhun Bayramov tərəfindən səsləndirilib.

Sessiya çərçivəsində Azərbaycan ümumi çağırışların aradan qaldırılması və inkişafın cəmiyyətin bütün təbəqələrinə çatdırılması üçün regional əməkdaşlığın gücləndirilməsinin vacibliyini vurğulayıb.

Nazir Ceyhun Bayramov Azərbaycanın təqdim etdiyi əsas siyasət istiqamətlərini diqqətə çatdıraraq inklüziv inkişaf, rəqəmsal transformasiya, yaşıl enerji keçidi, regional əlaqələndirmə, sülh quruculuğu və Cənub-Cənub əməkdaşlığına xüsusi diqqət yetirildiyini bildirib.

Azərbaycanın “Heç kəs kənarda qalmasın” gündəliyi çərçivəsində insan mərkəzli, dayanıqlı və bir-biri ilə əlaqəli regional gələcək vizyonu təqdim olunub.

Sessiyada “Azərbaycan 2030: sosial-iqtisadi inkişafa dair milli prioritetlər” çərçivəsində inklüziv iqtisadi artım, təhsil və səhiyyəyə bərabər çıxış, rəqəmsal ictimai xidmətlərin genişləndirilməsi və nəsillər arasında bərabər imkanlar kimi istiqamətlər xatırladılıb.

Bundan əlavə, Avrasiya üzrə əlaqələndirmədə Orta Dəhlizin strateji əhəmiyyəti vurğulanıb.

Sessiyanın əsas nəticələrindən biri Asiya və Sakit okean regionunda bütün yaş qrupları üçün sosial inkişafın təşviqinə dair Bakı–Banqkok Bəyannaməsinin qəbul edilməsi olub.

Bu sənəd inklüzivlik və dayanıqlı inkişaf üzrə ortaq öhdəliyi əks etdirir və ESCAP-ın inklüziv inkişaf gündəliyi ilə birbaşa uzlaşır.

Sessiyada üzv dövlətlərin, beynəlxalq təşkilatların və BMT tərəfdaşlarının yüksək səviyyəli nümayəndələri iştirak edərək inklüziv artım, sosial bərabərlik və dayanıqlı inkişaf məsələləri üzrə müzakirələr aparıblar.

Azərbaycan çoxtərəfli diplomatiyada aktiv rolunu davam etdirir və Asiya-Sakit okean regionu ilə əməkdaşlığını ümumi inkişaf məqsədləri naminə dərinləşdirməyə sadiqdir.

Həmrəylik, innovasiya və ortaq məsuliyyət prinsiplərinə əsaslanan Azərbaycan modeli insanı mərkəzə qoyan inkişafı təşviq edir, regional əlaqələndirməni gücləndirir, rəqəmsal və yaşıl keçidləri sürətləndirir, sülh və əməkdaşlığı möhkəmləndirir.