205 Ukraynalı Rusiya əsirliyindən azad edildi

Bu gün 205 Ukraynalı Rusiya əsirliyindən vətənlərinə qaytarıldı. Onlar "1000-ə 1000" mübadiləsinin birinci mərhələsinin bir hissəsi olaraq azad edildilər.

Herbiand.az xəbər verir ki, bunu Ukrayna Prezidenti Volodymyr Zelensky Telegram kanalında yazıb.

"Azad edilənlər arasında sıravi əsgərlər, çavuşlar və zabitlər var. Onların əksəriyyəti 2022-ci ildən bəri Rusiya əsirliyində olub. Onlar Ukraynanı Mariupolda və Azovstalda, Donetsk, Luqansk, Xarkov, Xerson, Zaporojye, Sumı və Kiyev istiqamətlərində, eləcə də Çernobıl Atom Elektrik Stansiyasında müdafiə ediblər", - deyə Zelensky bildirib.

Dövlət başçısı hərbçilərin vətənə qaytarmaq üçün çalışan hər kəsə təşəkkür edib.

"Ukraynalıları əsirlikdən azad etməyə kömək edən bütün tərəfdaşlarımıza təşəkkür edirik. Hələ də əsirlikdə olan hər bir insan üçün mübarizəmizi davam etdirəcəyik", - deyə prezident əlavə edib.