Ukrayna ordusu FSB-nin koordinasiya mərkəzini vurub

Ukrayna ordusunun “Alfa” Xüsusi Əməliyyatlar Mərkəzinin xüsusi təyinatlı qüvvələri müvəqqəti işğal altında olan Xerson bölgəsindəki pansionatda yerləşən Rusiya Federal Təhlükəsizlik Xidməti zabitlərinin koordinasiya mərkəzinə və yerləşdirmə məntəqəsinə uğurla hücum edib.

Herbiand.az xəbər verir ki, Ukrayna ordusunun yaydığı məlumata görə, koordinasiya mərkəzində təxminən 100 Rusiya hərbçisi ola bilər.

Ukrayna kəşfiyyatı həmçinin obyektdə 70-dən çox nəqliyyat vasitəsinin, silahlı mühafizəçilərin, nəzarət məntəqələrinin işlədiyini, mühəndis maneələrinin və yeraltı sığınacaqların tikildiyini təsdiqləyib.

Xüsusi əməliyyat zamanı vurulan zərbə genişmiqyaslı yanğına səbəb olub.

"Ukrayna ordusu Ukrayna Prezidenti Vladimir Zelenskinin təcavüzkar dövlətin hərbi və iqtisadi potensialını azaltmaq üçün qoyduğu tapşırıqları yerinə yetirməyə davam edir. Bu cür xüsusi əməliyyatlar müvəqqəti işğal olunmuş ərazilərdə düşmənə ciddi itkilər verir, komandanlıq və nəzarət sistemlərini pozur, rusları öz obyektlərini qorumaq üçün əlavə qüvvələri yenidən yerləşdirməyə məcbur edir və FSB bölmələrinin logistikasını və dəstəyini əhəmiyyətli dərəcədə çətinləşdirir", - deyə açıqlamada bildirilir.