ABŞ kəşfiyyatı yaxın illərdə Rusiya ilə NATO arasında birbaşa müharibə ehtimalını aşağı qiymətləndirir

ABŞ kəşfiyyat qurumları yaxın bir neçə il ərzində Rusiya ilə NATO arasında birbaşa hərbi qarşıdurmanın baş vermə ehtimalını aşağı hesab edir.

APA-nın məlumatına görə, bu barədə The Wall Street Journal (WSJ) ABŞ kəşfiyyatının qiymətləndirmələrinə istinadən yazıb.

Nəşrin məlumatına əsasən, Vaşinqton Rusiyanın hazırkı mərhələdə NATO üzvü olan dövlətlərə birbaşa hücum etməsini gözləmir. Bununla yanaşı, Moskvanın silahlı qüvvələrini genişləndirməsi və müdafiə sənayesinin istehsal imkanlarını artırması Alyans üçün uzunmüddətli təhlükə kimi qiymətləndirilir.

WSJ qeyd edir ki, ABŞ kəşfiyyatı Rusiyanın 2026-cı ildən sonra da ordusunun sayını və döyüş imkanlarını artırmağa, həmçinin silah istehsalını genişləndirməyə davam edəcəyini proqnozlaşdırır.

Ekspertlərin fikrincə, yaxın perspektivdə NATO ilə açıq hərbi toqquşma ehtimalı aşağı olsa da, Rusiya uzunmüddətli strateji hazırlığını davam etdirir.

Məqalədə vurğulanır ki, Rusiya-Ukrayna müharibəsinin inkişafı və Qərb ölkələrinin Kiyevə göstərdiyi hərbi-siyasi dəstək Avropanın təhlükəsizlik mühitinin formalaşmasında əsas amillərdən biri olaraq qalır.

Nəşrin yazdığına görə, ABŞ və onun müttəfiqləri Rusiyanın hərbi potensialının gələcəkdə NATO üçün daha ciddi təhlükəyə çevrilməsinin qarşısını almağı əsas strateji prioritetlərdən biri hesab edirlər.