Makron gənc qadın və kişilərin könüllü olaraq 10 aylıq ödənişli hərbi hazırlıq keçəcəyini nəzərdə tutan yeni planı açıqlayıb

Fransa prezidenti Emmanuel Makron gənc qadın və kişilərin könüllü olaraq 10 aylıq ödənişli hərbi hazırlıq keçəcəyini nəzərdə tutan yeni planı açıqlayıb.

Makron Rusiyanın Avropa ölkələrinə yönəlmiş təhdidinin artması fonunda Fransanın müdafiəsini gücləndirməyi hədəfləyərkən, noyabrın 27-də yeni könüllü hərbi xidmət proqramını elan edib.

Makron bildirib ki, böyük əksəriyyəti 18 və 19 yaşlarında olan könüllülər gələn ildən yalnız Fransa materikində və dənizaşırı ərazilərində 10 aylıq proqram çərçivəsində xidmətə başlayacaq və 2035-ci ilə qədər ildə 50.000 könüllünün qəbul edilməsi hədəflənir.

Bu kontekstdə, proqramın gələn yaydan etibarən mərhələli şəkildə tətbiqinə start veriləcəyi qeyd olunub. Makron “Varces” Hərbi Bazasında çıxışı zamanı bu xidmətin “gəncliyə göstərilən etimadın bir nümunəsi” olduğunu deyib. “Təhlükədən yayınmağın yeganə yolu ona hazır olmaqdır. Özümüzü müdafiə etmək, hazır olmaq və hörmət olunmaq üçün milləti səfərbər etməliyik”, - deyə o bildirib.

Tətbiqin ilk mərhələdə 2026-cı ildə 3.000 gənci əhatə edəcəyi, 2035-ci ilə qədər isə bu sayın 50.000-ə çatdırılmasının planlaşdırıldığı açıqlanıb. Hazırda Fransanın 200.000 hərbçisi və 47.000 ehtiyat personali mövcuddur. Yeni tənzimləmə ilə peşəkar hərbçilər, ehtiyat qüvvələr və könüllülərdən ibarət üçpilləli struktur yaradılması hədəflənir.

Avropa ölkələri artan “Rusiya təhdidi” səbəbilə müdafiə xərcləri ilə yanaşı, hərbi xidmət siyasətlərini də yenidən nəzərdən keçirməyə davam edirlər. Bunun son nümunələri ötən aylarda Serbiya və Xorvatiyada müşahidə olunub. 13 ildən sonra məcburi hərbi xidməti bərpa edən Serbiya sentyabr ayında prezident Aleksandar Vuçiçin ölkədə məcburi hərbi xidmətin 75 gün olması ilə bağlı özünə təqdim edilən təklifi qəbul etməsi ilə yeni mərhələyə keçmişdi. Oxşar şəkildə Xorvatiya parlamenti də ötən ilin oktyabr ayının sonunda 2008-ci ildə dayandırdığı məcburi əsas hərbi hazırlığı 17 ildən sonra bərpa edən qanun dəyişikliyini təsdiqləmişdi.