Endi Börnhem yeni evlənən cütlüyə sürpriz edib

Böyük Britaniyanın Baş naziri Endi Börnhem Mançesterdə nikaha daxil olan cütlüyə gözlənilməz videomüraciət göndərib.

Herbiand.az “The Independent”ə istinadla xəbər verir ki, gəlin Sara Börvin daha əvvəl sosial şəbəkədə paylaşdığı videoda Baş nazirdən toy günü Mançesterdə yaradılmış yeni hökumət ofisi – “No 10 North”a gəlməməsini xahiş edib.

Baş nazirin Mançesterdəki yeni ofisinin yerləşdiyi “Heron House” binasında şəhərin nikah qeydiyyatı idarəsi də fəaliyyət göstərir və cütlüyün nikah mərasimi məhz burada keçirilib. Gəlin yeni hökumət ofisi ilə əlaqədar binanın ətrafında təhlükəsizlik tədbirlərinin və polis iştirakının gücləndirilməsinin toy gününə təsir göstərə biləcəyindən narahatlığını ifadə edib. O, zarafatla Baş naziri toy mərasiminə dəvət edib, lakin ondan polis müşayiəti olmadan gəlməsini istəyib. Sara Börvin, həmçinin Börnhemin toydan sonrakı əyləncədə DJ kimi çıxış edə biləcəyini zarafatla təklif edib. Baş nazir mərasimə qatılmasa da, cütlük üçün xüsusi videomüraciət hazırlayıb. Börnhem dəvətə görə təşəkkür edib və gəlinin ilkin istəyinə hörmət edərək həmin gün “No 10 North”dan uzaq qalacağını bildirib: “Mən bu günü sizə mesaj göndərmədən ötürə bilməzdim. Ümid edirəm ki, gözəl gün keçirəcək və doyunca əylənəcəksiniz”.