Kəngərlidə şəhidlərə həsr olunmuş tədbir keçirilib

Kəngərli Rayon İcra Hakimiyyəti və “Naxçıvan Şəhid Ailələri” İctimai Birliyinin birgə təşkilatçılığı ilə Kəngərli rayonunda şəhidlərin əziz xatirəsinə həsr olunmuş anım tədbiri keçirilib.

Əvvəlcə Azərbaycan Respublikasının Dövlət Himni səsləndirilib. Daha sonra Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canından keçən bütün şəhidlərin, o cümlədən Kəngərli rayonunun şəhidlərinin əziz xatirəsi bir dəqiqəlik sükutla yad edilib.

Tədbirdə Kəngərli Rayon İcra Hakimiyyətinin başçısı Kamal Ələkbərov, “Naxçıvan Şəhid Ailələri” İctimai Birliyinin sədri Mayis Gülməmmədov, müharibə iştirakçısı, qazi kapitan Ülvi Abbaszadə, şəhid valideyinləri çıxış edib.

Tədbirdə çıxış edənlər 27 Sentyabr – Anım Gününün xalqımızın yaddaşında xüsusi yer tutduğunu qeyd ediblər. Bildirilib ki, 2020-ci il sentyabrın 27-də Ermənistan silahlı qüvvələrinin növbəti hərbi təxribatına cavab olaraq Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun başladığı əks-hücum əməliyyatı 44 günlük Vətən müharibəsinin başlanğıcı olub.

44 gün davam edən Vətən müharibəsində Azərbaycan Ordusu böyük qəhrəmanlıq göstərərək işğal altında olan ərazilərimizi azad edib və tarixi Zəfər qazanıb. Bu Qələbənin əldə olunmasında Kəngərli rayonundan olan igid oğulların da böyük fədakarlıq və qəhrəmanlıq göstərdikləri vurğulanıb.

Çıxışlarda şəhidlərin Vətən uğrunda keçdiyi şərəfli döyüş yolundan, onların qəhrəmanlığından və şəhid ailələrinə göstərilən dövlət qayğısından bəhs olunub.

Daha sonra I və II Qarabağ müharibəsində şəhid olmuş qəhrəmanların xatirəsinə həsr olunmuş videoçarx və Vətən müharibəsinin əsas məqamlarını, Azərbaycan Ordusunun şanlı yürüşünü və şəhidlərimizin qəhrəmanlıq yolunu əks etdirən sənədli xronika nümayiş olunub.

Kəngərli Rayon Mədəniyyət Sektorunun əməkdaşları tərəfindən “Biz şəhidlərin bacısıyıq” adlı ədəbi-bədii

kompozisiya təqdim olunub. Kompozisiya çərçivəsində Vətənə və şəhidlərə həsr olunmuş şeirlər səsləndirilib.

Bəxtiyar ƏLİYEV

“Naxçıvan Şəhid Ailələri” İctimai Birliyinin Mətbuat katibi