BMT QAK qış ərəfəsində Ukraynada köçkünlüyün artması barədə xəbərdarlıq edir

BMT-nin Qaçqınlar üzrə Ali Komissarlığının (BMT QAK) Avropa üzrə regional direktoru bildirib ki, bu il təşkilatın dəstəklədiyi mərkəzlərə 136 mindən çox ukraynalı evakuasiya olunub ki, bu da 2025-ci illə müqayisədə 70 faiz çoxdur.

Herbiand.az təşkilatın məlumatına istinadla xəbər verir ki, BMT QAK oktyabrın 27-də yaydığı bəyanatda Rusiyanın Ukraynanın enerji infrastrukturuna və mülki obyektlərinə hücumlarının artmasının daha çox köçkünlüyə səbəb olması, milyonlarla insanı istilik və elektrik enerjisindən məhrum etməsi, suya və digər zəruri əşyalara məhdud çıxışın yaranması barədə xəbərdarlıq edib.

BMT QAK-ın Avropa üzrə regional direktoru Filip Lekler Cenevrədə jurnalistlərə bildirib ki, getdikcə artan raket və dron hücumları Ukrayna boyunca, o cümlədən cəbhə xəttindən uzaq ərazilərdə mülki şəxsləri təhdid edir.

Sentyabrın əvvəlindən oktyabrın ortalarına qədər BMT QAK-ın personalı və ya humanitar tərəfdaşları 10 təhlükəsizlik hadisəsi, o cümlədən yardım işçilərinin, ofislərin, anbarların və aydın şəkildə işarələnmiş humanitar nəqliyyat vasitələrinin yaxınlığında partlayışlarla üzləşib.

Lekler deyib: “BMT QAK Rusiya Federasiyasını mülki şəxslərə hücumları dayandırmağa çağırır, həmçinin humanitar işçilərin və aktivlərin qorunmalı, hədəf kimi qəbul edilməməli olduğunu bir daha təkrarlayır”.

Ali Komissarlığın məlumatına görə, yanvar ayından bəri BMT QAK-ın dəstəklədiyi tranzit mərkəzlərindən 136 mindən çox evakuasiya olunmuş şəxs keçib ki, bu da 2025-ci ildə qeydə alınan təxminən 80 min nəfərdən təxminən 70 faiz çoxdur. Köçkünlərin təxminən 40 faizi yaşlı, digərləri isə əlil insanlardır.

Ukrayna daxilində təxminən 10,8 milyon insanın humanitar yardıma ehtiyacı var, təxminən 5,2 milyon ukraynalı qaçqın isə Avropada qalır.

Lekler, həmçinin Avropanın bəzi yerlərində qaçqınlar əleyhinə ritorikanın və onlara a qarşı düşmənçiliyin artdığı barədə xəbərdarlıq edərək, hökumətləri ukraynalılara və qəbul edən icmalara dəstəyi davam etdirməyə çağırıb.

Son araşdırma nəticəsində məlum olub ki, 2025-ci ildə Avropanın 9 ölkəsində yetkin ukraynalı qaçqınların 67 faizi işlə təmin olunub, qaçqın uşaqların isə 84 faizi yerli məktəblərdə təhsil alır.