Həbsxana işçisi qatilə aşiq oldu: Məhkəməyə çıxacaq

29 yaşlı britaniyalı tibb bacısı Stefani Ader məhkum edilmiş qatillə münasibət qurduğuna görə cinayət məsuliyyətinə cəlb olunub. Qadın məhbusla gizlicə görüşməklə yanaşı, ona qanunsuz olaraq mobil telefon da verib. Məhkəmədə o, günahını etiraf edib.

Herbiand.az bildirir ki, bu barədə Daily Mail qəzeti yazıb.

28 yaşlı Jaki Krosdeyl cəzasını Londonun Uondsvort həbsxanasında  çəkirdi. Ader də orada işləyirdi. Kişi qətl və narkotiklə bağlı cinayətlərdə məhkum edilib, lakin bu, həbsxana əməkdaşının onunla münasibət qurmasına mane olmayıb.

Nəşrin məlumatına görə, münasibət təxminən bir il davam edib. Sevgilisi ilə əlaqə saxlamaq üçün tibb bacısı müəyyən edilmiş qaydaları pozaraq onun kamerasına gizlicə telefon da aparıb.

Münasibətlər məlum olanda, Ader işindən kənarlaşdırılıb. Hadisə məhkəməyə qədər çatıb və o, irəli sürülən ittihamlara qarşı çıxmayıb. Məhkəmə prosesi zamanı tibb bacısının atası onun adından vasitəçilik etməyə çalışıb. Qızın atası deyib ki, o və həyat yoldaşı hər ikisi müəllim olub və ailələri həmişə yüksək əxlaqi prinsiplərə riayət ediblər.

Ader hazırda məhkəmənin qərarını gözləyir. Qərarın 2027-ci ilin fevral ayında verilməsi gözlənilir.

Bəxtiyar CƏFƏRLİ