KİV: Ukrayna Rusiyanın neft emalı zavodlarına zərbələri dayandırmağa razılaşmayıb

Ukrayna Rusiyanın neft emalı zavodlarına zərbələr endirməyi dayandırmağa heç vaxt razılaşmayıb.

Bu barədə Ukrayna rəsmiləri “The Kyiv Independent” nəşrinə məlumat veriblər.

Qeyd olunur ki, bundan əvvəl Qərb mediası öz mənbələrinə istinadən Ukraynanın Rusiyanın neft emalı zavodlarına hücumlarda fasilə verməyə razılıq verdiyini yazmışdı. Lakin “The Kyiv Independent”in həmsöhbətləri bu məlumatı təkzib ediblər.

Nəşr xatırladıb ki, xüsusilə oktyabrın 30-da Ukrayna Müdafiə Qüvvələri Rusiyanın Samara vilayətində yerləşən Novokuybışevsk neft emalı zavoduna zərbə endirib. Hücumdan qısa müddət sonra NEZ-in ərazisində yanğın qeydə alınıb.

Ukrayna rəsmiləri jurnalistlərə bildiriblər ki, ABŞ Prezidentinin xüsusi nümayəndəsi Cared Kuşner həqiqətən də Ukraynanın Rusiyanın neft emalı zavodlarına zərbələri ən azı müvəqqəti dayandırmasında israr edib. Lakin Kiyev buna heç vaxt razılıq verməyib.

“Cared bizə 30 gün ərzində neft emalı zavodlarına zərbələr endirməməyi təklif etdi. Lakin heç kim belə bir əmr verməyib”, – deyə yüksək vəzifəli ukraynalı rəsmi jurnalistlərə bildirib.

Digər yüksək vəzifəli ukraynalı rəsmi nəşrə bildirib ki, Ukrayna Rusiyanın neft infrastrukturuna zərbələr endirməyə davam edəcək, lakin belə hücumlara görə məsuliyyəti açıq şəkildə üzərinə götürməyəcək. Bununla Kiyev Donald Tramp administrasiyası ilə qəsdən qarşıdurmaya girdiyi təəssüratının yaranmasının qarşısını almaq istəyir.

Ukrayna hökumətinin ictimaiyyətə açıqlama verməməsinə baxmayaraq, Ukraynanın müdafiə şirkəti “Fire Point” Rusiyanın neft emalı zavodlarına endirilən zərbələrin nəticələrini paylaşmağa davam edir. Xüsusilə, şirkət bu yaxınlarda Novokuybışevsk NEZ-in vurulmasını qeyd edib.

Rusiya hökuməti də öz neft emalı zavodlarına Ukrayna tərəfindən zərbələr endirildiyini təsdiqləyib. Belə ki, Rusiyanın Baş nazirinin müavini Aleksandr Novak oktyabrın 30-da Ukraynanın Rusiyada yerləşən üç neft emalı zavoduna və bir qaz-kimya kompleksinə zərbələr endirdiyini bildirib.

Rusiyanın neft emalı zavodlarına hücumda yeganə qısa fasilə

Nəşr qeyd edib ki, Ukraynanın Rusiyanın neft infrastrukturuna qarşı uzunmüddətli hücum kampaniyasında yeganə fasilə oktyabrın 11-də ABŞ Prezidenti Donald Trampın birtərəfli qaydada “enerji atəşkəsi” elan etməsindən sonra baş verib. Həmin vaxt Ukrayna Rusiyanın ABŞ liderinin elan etdiyi şərtlərə əməl etmək niyyətində olmadığı aydınlaşana qədər zərbələri təxminən 72 saat müddətinə dayandırıb.

Nəşr xatırladıb ki, Trampın “enerji atəşkəsi” adlandırdığı razılaşmanı elan etməsindən qısa müddət sonra Rusiya Xarkov İstilik Elektrik Mərkəzi-5-ə (İEM-5) qanadlı raketlərlə zərbə endirib. Bu hadisə Ukraynanı Rusiyanın atəşkəsə əməl etmək niyyətində olmadığı qənaətinə gətirib.

Bundan əlavə, Ağ Evə yaxın mənbə jurnalistlərə bildirib ki, Tramp administrasiyasının Ukraynanın Rusiyanın neft infrastrukturuna zərbələri ilə bağlı ritorikasının böyük hissəsi daxili auditoriyaya hesablanıb. O qeyd edib ki, Mərkəzi Kəşfiyyat İdarəsi (MKİ) Rusiyanın hava hücumundan müdafiə vasitələrinin yerləşdiyi yerlər barədə Ukraynaya kəşfiyyat məlumatları verməyə davam edir. Bu da Ukraynanın Rusiyanın neft emalı zavodlarına qarşı zərbələr kampaniyasının həyata keçirilməsinə şərait yaradıb.

Xatırladaq ki, oktyabrın 30-da səhər saatlarında Rusiyanın Samara vilayətinin Novokuybışevsk şəhərində yerləşən neft emalı zavodunda yanğın baş verib. Bundan əvvəl vilayətdə pilotsuz uçuş aparatlarının hücumu təhlükəsi elan edilib, yerli hava limanı isə bağlanıb.

Novokuybışevsk NEZ-də Rusiya aviasiyası üçün yanacaq da daxil olmaqla, 20-dən çox növ neft məhsulu istehsal olunur. Müəssisənin layihə üzrə illik neft emalı gücü təxminən 8,8 milyon ton təşkil edir.

“Fire Point” şirkəti Ukrayna Müdafiə Qüvvələrinin FP-1 dronları vasitəsilə bu NEZ-ə zərbə endirdiyini təsdiqləyib.

Bundan başqa, oktyabrın 31-də Rusiyanın Ufa şəhərində pilotsuz uçuş aparatları Şimal Sənaye Zonasına hücum edib. Həmin ərazidə faktiki olaraq bir-birinə çox yaxın məsafədə yerləşən üç neft emalı zavodu var. Hücumdan sonra ərazidə yanğın başlayıb.

“Başneft-Novoil” zavodunda yanğın baş verib. Alovun L-35 katalitik riforminq qurğusunu əhatə etmiş ola biləcəyi bildirilir. Bu qurğu istənilən iri neft emalı zavodunun ən mühüm bölmələrindən biridir.