Cənubi Koreyanın Hanwha şirkəti Almaniyada möhkəmlənir

Cənubi Koreyanın müdafiə və aerokosmik istehsalçısı olan Hanwha Aerospace şirkəti Avropadakı mövcudluğunu gücləndirməyi hədəfləyib.

Herbiand.az bildirir ki, şirkət Hanwha Defence Deutschland GmbH (HDD) şirkətini Berlində qeydiyyatdan keçirib.

Hanwha Almaniyanı müdafiə fəaliyyətləri və sənaye əməkdaşlığı üçün Avropanın mərkəzi kimi görür. Şirkətin məqsədi Şimali Atlantika Alyansının müdafiə qabiliyyətinin gücləndirilməsinə töhfəsini daha da genişləndirməkdir.

Hanwha Defence Germany sursat, hava hücumundan müdafiə, artilleriya və uzun mənzilli dəqiq silahlar da daxil olmaqla bir neçə sahədə bazara hazır texnoloji həllər təklif edəcək.

Məqsəd mövcud istehsal güclərindən istifadə edərək qısa müddətdə boşluqları və potensial maneələri aradan qaldırmaqla dərhal istehsalı təmin etməkdir.

Bundan başqa, Hanwha Almaniyada əlavə istehsal müəssisələrinin tikintisi ilə bağlı aktiv müzakirələr aparır.

Eyni zamanda, Hanwha Avropada və NATO-da mövcudluğunu genişləndirməyə davam edir. Polşada ballistik raketlərin istehsalı üzrə birgə müəssisə yaradılıb. Rumıniyada özüyeriyən artilleriya sistemlərinin istehsalı üçün zavod tikilir.

Hanwha şirkəti həmçinin, Estoniyada müdafiə sənayesi imkanlarını genişləndirmək və yerli tərəfdaşlarla əməkdaşlığı dərinləşdirmək üçün yeni investisiya təşəbbüslərini təşviq edir.

Bəxtiyar CƏFƏRLİ