Fransa qırıcıları üç qitə üzərində 40 günlük missiyaya yola düşüb

Fransa Hərbi Hava Qüvvələrinə məxsus dörd “Rafale” qırıcı təyyarəsi Arktika, Hind-Sakit okean və Yaxın Şərqi əhatə edən 40 günlük “Pegasus-2026” missiyasının bir hissəsi olaraq İstr aviabazasından yola düşüb.

Herbiand.az bildirir ki, bu barədə The Defense Post qəzeti yazıb.

Məlumata görə, təxminən 40.000 kilometrlik missiya doqquz dayanacaq olmaqla üç qitəni əhatə edəcək.

Qrup iki tək oturacaqlı və iki iki oturacaqlı təyyarədən ibarətdir. Onları üç A330 MRTT hava yanacaq doldurma tankeri, iki A400M hərbi nəqliyyat təyyarəsi və təxminən 300 hərbi qulluqçu müşayiət edir.

Missiyanın əsas məqsədi Fransanın döyüş təyyarələrini ölkədən uzaqda yerləşdirmək və saxlamaq qabiliyyətini sınamaq, eləcə də tərəfdaş hava qüvvələri ilə qarşılıqlı əlaqəni yaxşılaşdırmaqdır.

Bəxtiyar CƏFƏRLİ