Azərbaycan Universitetində Seyid Əzim Şirvaninin 190 illik yubileyi qeyd olunub

Azərbaycan Universitetində ədəbiyyatımızın görkəmli nümayəndəsi, böyük şair, maarifçi və ictimai xadim Seyid Əzim Şirvaninin 190 illik yubileyinə həsr olunan “Aləmdə səsim var mənim” adlı musiqili ədəbi-bədii gecə keçirilib. Ədəbi-bədii gecədə Seyid Əzim Şirvaninin Azərbaycan ədəbiyyatı tarixində silinməz iz qoyduğu diqqətə çatdırılıb, tələbələrin ifasında böyük şairin zəngin bədii irsindən poetik nümunələr təqdim olunub.

Universitetdən Herbiand.az-a bildirilib ki, tədbiri Humanitar və sosial elmlər fakültəsinin dekanı Səfər Məmmədov açaraq Seyid Əzim Şirvaninin yaradıcılığındakı janr müxtəlifliyini vurğulayıb, Azərbaycan ədəbiyyatına gətirdiyi yeniliklərdən söz açıb. Dekan çıxışında onun öz maarifçi ideyalarını həyata keçirmək üçün ana dilində açdığı yeni üsullu məktəb ilə adını ölkənin pedaqoji fikir tarixinə yazdırdığını da qeyd edib.

Açılış nitqinin ardından tədbir musiqili bədii kompozisiya ilə davam edib. Kompozisiyada dahi şairin insanları həyatın gözəlliklərindən zövq almağa çağıran qəzəlləri, mənəvi gözəlliyi tərənnüm edən, öyüd və nəsihətləri ilə elmə yiyələnməyi, humanist ideyaları təbliğ edən, dövrün aktual məsələlərinə münasibət bildirdiyi əsərlərindən nümunələr təqdim olunub, qəzəlləri ifa olunub.

Elmi işlər üzrə prorektor Yusif Qasımov, Tərcümə və filologiya kafedrasının müdiri Gülnar Rzayeva, kafedranın müəllimi Ülviyyə Əliyeva, kafedranın müəllimi və kompozisiyanın bədii rəhbəri Solmaz Süleymanova çıxış edərək Seyid Əzim Şirvaninin çoxşaxəli irsinin qorunub saxlanmasının əhəmiyyətini, yaradıcılığının müasir dövrün tələbləri baxımından dərindən araşdırılmasının zəruriliyini diqqətə çatdırıb, ədəbi-bədii kompozisiyada iştirak edən tələbələrə təşəkkür ediblər.

Qeyd edək ki, tədbir Prezident İlham Əliyevin “Seyid Əzim Şirvaninin 190 illiyinin qeyd edilməsi haqqında” Sərəncamını rəhbər tutaraq Tərcümə və filologiya kafedrasının təşəbbüsü və təşkilatçılığı ilə hazırlanıb.