Ermənistan ABŞ-dan investisiyaların artımını gözləyir – Bloomberg

Ermənistan, ölkənin illik iqtisadi məhsulunun təxminən yarısını təşkil edən, 13 milyard dolları keçə biləcək potensial ABŞ investisiya dalğasına hazırlaşır.

Herbiand.az xəbər verir ki, bu barədə ABŞ-ın vitse-prezidenti J.D. Vensin səfərinin iqtisadi təsiri haqqında “Bloomberg”in məqaləsində deyilir.

Nüfuzlu media orqanı belə bir investisiya bumunun ölkənin Rusiyadan uzun müddətdir davam edən iqtisadi asılılığını zəiflədə biləcəyinə işarə edir. "ABŞ-ın vitse-prezidenti J.D. Vensin bu həftə Ermənistana səfəri zamanı 9 milyard dollara qədər dəyərində mülki nüvə enerjisi əməkdaşlığı müqaviləsi imzalaması Vaşinqtonla kiçik keçmiş sovet respublikası arasında əlaqələrin kəskin şəkildə dərinləşməsinin mümkünlüyünü göstərir. Ayrı olaraq qeyd etmək lazımdır ki, 4 milyard dollarlıq süni intellekt proqramının genişləndirilməsi Ermənistanın 27 milyard dollarlıq iqtisadiyyatının perspektivini də əhəmiyyətli dərəcədə dəyişə bilər".

"Ermənistanla razılaşmalar və Vensin ertəsi gün qonşu Azərbaycana səfəri Qafqaz regionunda təsir uğrunda artan geosiyasi rəqabəti vurğuladı. Region Çini Orta Asiya vasitəsilə Avropaya birləşdirən həyati əhəmiyyətli ticarət və enerji dəhlizidir və onilliklərdir Moskvanın təsir dairəsindədir", - deyə Bloomberg yazır və bu hadisələrin ABŞ prezidenti Donald Trampın iştirakı ilə Ermənistanın Baş naziri Nikol Paşinyan və Azərbaycan prezidenti İlham Əliyev arasında 8 avqust 2025-ci ildə əldə edilən sülh razılaşmasından sonra baş verdiyini xatırladır.

Məqalədə Azərbaycanla hərbi tərəfdaşlıq müqaviləsi olan Türkiyə 1993-cü ildən bəri bağlı olan Ermənistanla sərhədini açmaq üçün addımlar atması da vurğulanır. Bildirilir ki, Sovet İttifaqının dağılmasından bəri ilk dəfə Türkiyə Ermənistanla diplomatik münasibətlər qurmağa yaxındır.

Bundan başqa məqalədə qeyd olunur ki, Avropa İttifaqı da hazırda Rusiya ilə eyni gömrük ittifaqının, Avrasiya İqtisadi Birliyinin üzvü olmaqla yanaşı, gələcəkdə Aİ-nıln üzvlüyünə dair ambisiyalarını bəyan edən Ermənistanla əlaqələrini dərinləşdirir.