Ukrayna idarə olunan aviabomba istehsalına başlayıb

Ukraynanın ilk idarə olunan hava bombası (İOHB) döyüş istifadəsinə hazırdır. Onun hazırlanması 17 ay davam edib.

Bu barədə Ukraynanın müdafiə naziri Mixaylo Fedorov Telegram kanalında məlumat verib.

"Biz cəbhə üçün Ukraynanın yüksək texnologiyalı həllərini inkişaf etdirməyə davam edirik. Brave1 iştirakçısı artıq lazımi sınaqlardan keçmiş və döyüş istifadəsinə hazır olan ilk Ukrayna idarə olunan hava bombasını yaradıb", - deyə o qeyd edib.

Onun sözlərinə görə, İOHB unikal dizayna malikdir və müasir müharibənin reallıqları nəzərə alınmaqla yaradılıb. O əlavə edib ki, bu, Qərb və ya Sovet bombalarının eynisi deyil. İstehkamları, komanda məntəqələrini və digər düşmən hədəflərini buraxılışdan sonra onlarla kilometr dərinlikdə effektiv şəkildə məhv etmək üçün ukraynalı mühəndislər tərəfindən hazırlanmış patentləşdirilmiş bir sursatdır.

Fedorov bildirib ki, bombanın döyüş başlığı 250 kq ağırlığındadır. O qeyd edib ki, Müdafiə Nazirliyi artıq ilk eksperimental partiyanı alıb və pilotlar döyüş ssenarilərini tətbiq edir və yeni silahı real müasir müharibə şəraitinə uyğunlaşdırırlar.

Nazir bildirib ki, Ukrayna İOHB-ları tezliklə düşmən hədəflərinə qarşı əməliyyat keçirəcək.