Rusiyanın Ermənistan seçkilərinə təsir göstərmək üçün kampaniyanı kimlər əlaqələndirir?

"The Insider" internet resursu Rusiyanın Ermənistanda 7 iyunda keçiriləcək parlament seçkilərinə mümkün təsiri, Rusiya Prezident Administrasiyası daxilində Ermənistanla bağlı işlərin əlaqələndirilməsi və İrəvana ezam olunan rəsmilər haqqında maraqlı bir araşdırma təqdim edib.

Nəşr yazır: “Moldova və Macarıstandakı uğursuzluqlarından sonra Kreml bütün resurslarını 7 iyunda parlament seçkilərinin keçiriləcəyi Ermənistana yönəldib. Kreml AB ​​və ABŞ ilə yaxınlaşma kursu müəyyən edən Ermənistanın Baş naziri Nikol Paşinyanın Vətəndaş Müqaviləsi partiyasının qələbəsinin qarşısını almağa ümid edir.

“The Insider” qəzeti Rusiya Prezident Administrasiyasında Ermənistan işlərinə kimin nəzarət etdiyini, bu məqsədləri həyata keçirmək üçün İrəvana  Xarici Kəşfiyyat Xidmətinin, Baş Kəşfiyyat İdarəsinin və Federal Təhlükəsilik Xidmətinin hansı zabitlərinin göndərildiyini və müxalifət namizədlərinin Rusiya kəşfiyyat xidmətləri ilə necə əlaqəli olduğunu aydınlaşdırmağa çalışıbb.

Nəşr yazır ki, Paşinyana qarşı informasiya kampaniyası 2025-ci ildə yaradılmış Prezident Administrasiyasının Strateji Tərəfdaşlıq və Əməkdaşlıq Departamenti (USPS) tərəfindən koordinasiya olunur və bu Departamentə Rusiya Federasiyası Prezident Administrasiyası rəhbərinin birinci müavini Sergey Kiriyenkonun tələbəsi və keçmiş “Rosatom” rəsmisi Vadim Titov rəhbərlik edir. “Onun [Titovun] bu vəzifəyə başlaması o qədər də uğurlu olmayıb: Macarıstan seçkilərindən əvvəl o, köməkçisi (həmçinin “Rosatom” rəsmisi) Yeqor Kvyatkovski ilə Budapeştə uçub. Lakin kampaniya Orbanın sarsıdıcı məğlubiyyəti ilə başa çatdı. Nəşr yazır ki, "İndi onun karyerasını davam etdirmək üçün yeni bir şansı var".

"The Insider"in məlumatına görə, Rusiya Prezident Administrasiyasında Ermənistan işlərinə birbaşa nəzarət edənlər ABŞ Təhlükəsizlik Xidmətinin Regionlararası və Sosial-mədəni Əlaqələrin İnkişafı Departamentinin rəhbəri Valeri Çernışov və onun müavini Dmitri Avanesovdur - hər ikisi kəşfiyyat xidmətlərinin nümayəndələridir. "2013-cü ildə Abxaziyadakı Rusiya hərbi bazasında xidmət etdikdən sonra Çernışov hərbi kəşfiyyata dəvət edildi və o, Şyolkovski rayonunun Zaqoryanski kəndində (36360 saylı hərbi hissə) QRU zabitlərinin hazırlanması kursunda sabotajın əsaslarını tədris etdi. O, əvvəlcə Gürcüstanda kuratorluq edib, sonra isə Ermənistana dəyidirildi".

Qeyd olunur ki, Dmitri Avanesov Böyük Pyotr adına Raket Qüvvələrinin Hərbi Akademiyasını bitirib və polkovnik rütbəsi daşıyır. 2012-ci ildə o, FTX-nın Moskva Yeni İnformasiya Texnologiyaları İnstitutunda "Milli Təhlükəsizlik Vəziyyətinin Qiymətləndirilməsi, Təhlili və Proqnozlaşdırılması Sistemləri" proqramını öyrənərək qabaqcıl təlim keçib. Hər iki şəxs dəfələrlə İrəvana səfər edib və Kremlin yerli müttəfiqləri ilə görüşüb.

"Rusiya hökumətində Ermənistan işləri ilə Baş nazirin müavini Aleksey Overçuk məşğul olur. O, sözün əsl mənasında hər həftə Ermənistanı Avropa İttifaqı və ABŞ ilə yaxınlaşmasını davam etdirəcəyi təqdirdə böyük iqtisadi problemlərlə hədələyir".

Siyahını davam etdirən nəşr qeyd edir ki, Ermənistandakı ən aktiv qruplardan bəziləri Kremlyönlü narrativləri təbliğ edən Qorçakov Fondu; karyeralı Xarici Kəşfiyyat Xidmətinin zabiti Vladislav Qasumyanovun rəhbərlik etdiyi Milli Rabitə İnkişafı Tədqiqat İnstitutu (NIIRC); xarici kəşfiyyat beyin mərkəzi olan Rusiya Strateji Araşdırmalar İnstitutu (RISS); və Köhnə Meydandan (Prezident Administrasiyasının binasının yerləşdiyi yer - red.) maliyyə alan bir çox yalançı politoloq, ekspert, şura və təşkilatdır.

“Paşinyana qarşı təbliğat kampaniyasının ön sıralarında çoxdan tanış olan şəxslər - senatorlar Konstantin Kosaçev və Konstantin Zatulin dayanır. Senator Zatulin, yeri gəlmişkən, “Taşir”in sahibi milyarder Karapetyanın da daxil olduğu Beynəlxalq Rusiya-Ermənistan Lazarevski Klubuna rəhbərlik edir”, - deyə “The Insider” yazır.

Nəşrdə həmçinin Ermənistandakı siyasi mübarizədə iştirak etdiklərini bəyan edən iki qüvvənin liderlərinin - “Güclü Ermənistan” blokunun lideri Samvel Karapetyanın və “Çiçəklənən Ermənistan” partiyasının sədri Qaqik Tsarukyanın Rusiya ilə əlaqələri barədə məlumat dərc olunub.