Amur Gəmiqayırma Zavodunda "Qroznı" korveti suya salınıb

Ötən həftə "Qroznı" korveti Amur Gəmiqayırma Zavodundakı emalatxanadan suya salınıb. Bu, Rusiya Hərbi Dəniz Qüvvələri üçün Amur Gəmiqayırma Zavodunda inşa edilən beşinci çoxməqsədli 20380 layihəli gəmidir.

Herbiand.az-ın məlumatına görə, bu barədə Birləşmiş Gəmiqayırma Korporasiyasının mətbuat xidmətindən bildirilib.

Mərasimdə Sakit okean donanmasının baş komandanı, admiral Viktor Liina, Xabarovsk diyarının qubernatoru Dmitri Demeşin, Komsomolsk-na-Amur administrasiyasının nümayəndələri və müəssisənin veteranları iştirak ediblər.

Admiral qeyd edib ki, "Qroznı" korvetinin heyəti artıq formalaşıb və 5 oktyabrdan təlimlərə başlayıb: “Daha sonra onlar gəminin tikintisini sizinlə birlikdə başa çatdırmaq və onu yaxın illərdə donanmaya daxil etmək üçün gəmiqayırma zavoduna gələcəklər”.

Bəxtiyar CƏFƏRLİ