Polşa hərbçiləri PUA-nı vurmaq əvəzinə 112-yə zəng edib

Polşa Milli Müdafiə Nazirliyi ABŞ-ın Redzikovodakı Aegis Ashore raketdən müdafiə bazası yaxınlığında pilotsuz təyyarə ilə bağlı hadisəyə rəsmi şərh vermək məcburiyyətində qalıb.

Herbiand.az bildirir ki, bu barədə Onet nəşri xəbər verib.

Məlumata görə, uçuş icazəsi olmayan mülki pilotsuz təyyarə ABŞ raketdən müdafiə sisteminin bir hissəsini dəstəkləyən ölkənin ən vacib hərbi qurğularından birinin üzərində peyda olub. Nəşrin mənbələrinə görə, Polşa hərbçiləri pilotsuz təyyarəni zərərsizləşdirmək və ya fiziki olaraq məhv etmək əvəzinə, standart inzibati prosedurlara başlayıblar: növbətçi zabit 112-yə zəng edib.

Nazirlik aydınlaşdırıb ki, pilotsuz təyyarə birbaşa baza üzərində fəaliyyət göstərməyib, lakin onun uçuşu pilotsuz təyyarələrin uçuşunun qadağan olunmuş zonasını pozub. Pilotsuz təyyarəni aşkar etdikdən sonra hərbçilər operatorun PUA-nı hansı yerdən uçurduğunu müəyyən edib və bundan sonra hadisə barədə polis də daxil olmaqla müvafiq xidmətlərə məlumat verilib.

"Obyekt tam nəzarət altında izlənilib, pilotsuz təyyarə Redzikovo bazasındakı vacib obyektlərə yaxınlaşmayıb", - Nazirlik vurğulayıb.

Bəxtiyar CƏFƏRLİ